ໃນລະຫວ່າງ ວັນທີ 11-13 ກັນຍາ 2018 ທີ່ ເມືອງໜານໜິງ, ສປ.ຈີນ ໄດ້ມີການຈັດ ກອງ​ປະ​ຊຸມໃນ​ວຽກ​ງານ​ການ​ຮ່ວມ​ມື​ດ້ານ​ສິ່ງ​ແວດ​ລ້ອມ ອາຊຽນ-ຈີນ ປະຈຳປີ 2018 ແລະ ງານວາງສະແດງສິນຄ້າ ອາຊຽນ-ຈີນ ຄັ້ງທີ 15 (The 15th China-ASEAN Expo). ກອງປະຊຸມດັ່ງກ່າວ ມີຜູ້ເຂົ້າຮ່ວມ ຈາກທາງພາກລັດ, ເອກະຊົນ ແລະ ອົງການສາກົນ ທັງໝົດ ຫຼາຍກວ່າ 320 ທ່ານ; ໃນນັ້ນ ລວມມີຜູ້ແທນ ຈາກ ບັນດາປະເທດສະມາຊິກ ອາຊຽນ, ກອງ​ເລ​ຂາອາ​ຊຽນ,  ແລະ ອຳ​ນາດ​ການ​ປົກ​ຄອງເມືອງ ຈາກ ສປ ຈີນ. ສະເພາະ ສປປ ລາວ ເຂົ້າຮ່ວມ ຕ່າງຫນ້າ ໂດຍ ທ່ານ ນ. ບຸນຄຳ ວໍລະຈິດ, ຮອງລັດຖະມົນຕີ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ພ້ອມດ້ວຍຄະນະ ຈຳນວນ 4 ທ່ານ.

ໃນຕອນເຊົ້າ ວັນທີ 11 ກັນຍາ 2018 ແມ່ນເປັນພິທີເປີດ ຢ່າງເປັນທາງການ ໂດຍການເຂົ້າຮ່ວມ ຂອງທ່ານ ຊາວຈິງມີນ (Shao Yingmin) ຮອງລັດຖະມົນຕີ ກະຊວງ ນິເວດ ແລະ ສິ່ງແວດລ້ອມ ສປ ຈີນ,​ ທ່ານ ຮອງເຈົ້າແຂວງ ແຂວງກວາງຊີ, ທ່ານ ຮອງລັດຖະມົນຕີ ກະຊວງ ສິ່ງແວດລ້ອມ ແລະ ຊັບພະຍາກອນນໍ້າ ສີງກະໂປ, ຮອງຫົວໜ້າກອງເລຂາ ອາຊຽນ, ຊື່ງໃນພິທີດັ່ງກ່າວ ທ່ານ ນ. ບຸນຄຳ ວໍລະຈິດ ກໍໄດ້ຂື້ນກ່າວ ມີຄຳເຫັນໃນພິທີເປີດ.

ໃນໄລຍະໄປເຂົ້າຮ່ວມກອງປະຊຸມ ຄະນະຜູ້ແທນລາວ ກໍໄດ້ ພົບປະ ສອງຝ່າຍ ກັບຄະນະຜູ້ແທນຈາກ  ສີງກະໂປ ແລະ ຄະນະເຈົ້າພາບ ສປ ຈີນ. ຜ່ານການເຂົ້າຮ່ວມກອງປະຊຸມ ສາມາດ ຖອດຖອນບົດຮຽນໄດ້ຄື:

  1. ກອງປະຊຸມດຳເນີນໄປດ້ວຍ ບັນຍາກາດທີ່ດີ ບໍ່ວ່າຈະເປັນການປຶກສາຫາລື ແລະ ແລກປ່ຽນຄຳຄິດເຫັນໃນກອງປະຊຸມຍ່ອຍກ່ຽວກັບ ການກໍ່ສ້າງລະບົບນິເວດຂອງຕົວເມືອງ ເພື່ອບັນລຸຕາມເປົ້າໝາຍການພັດທະນາແບບຍືນຍົງ ແລະ ການນຳໃຊ້ເທັກໂນໂລຊີທີ່ເປັນມິດກັບສິ່ງແວດລ້ອມ.
  2. ການພັດທະນາຕົວເມືອງສີຂຽວ ສະອາດ ແລະ ງາມຕາຂອງ ສປ. ຈີນ ມີລັກສະນະເຂັ້ມແຂງ, ຈິງຈັງ ແລະ ໄດ້ມີການນຳພາ ຈັດຕັ້ງປະຕິບັດ ຢ່າງຈະແຈ້ງ ນັບແຕ່ຂັ້ນສູນກາງຮອດທ້ອງຖິ່ນ ທາງພາກລັດ ແລະ ເອກະຊົນ. ສິ່ງທີ່ພົ້ນເດັ່ນທີ່ສຸດ ກໍ່ຄື: ລະບົບການປູກປ່າໃນຕົວເມືອງ ໂດຍສະເພາະລຽບຕາມທຸກເສັ້ນທາງ ແລະ ໃຈກາງຖະໜົນທຸກເສັ້ນ ແມ່ນມີການປູກ ແລະ ການດູແລຮັກສາພັນໄມ້ຫຼາກຫຼາຍຊະນິດເປັນຢ່າງດີ ເປັນຕົ້ນ: ໄມ້ຂະຍຸງ ຈົນຮອດພັນໄມ້ພຸ້ມເຕ້ຍ.
  3. ລັດຖະບານສປ. ຈີນ ຍັງໄດ້ໃຫ້ຄວາມສຳຄັນ ກັບບັນຫາສິ່ງແວດລ້ອມ ໂດຍສະເພາະການແກ້ໄຂບັນຫາມົນລະພິດທາງອາກາດ, ທາງດິນ ແລະ ທາງນໍ້າ ຢ່າງເອົາຈິງເອົາຈັງ ເຫັນໄດ້ວ່າ ສປ.ຈີນມີການຈັດຕັ້ງປະຕິບັດແບບພ້ອມພຽງກັນໃນຂອບເຂດທົ່ວປະເທດ.
  4. ໃນໄລຍະການພົບປະສອງຝ່າຍ ເຫັນວ່າ ສປ ຈີນ ແລະ ສິງກະໂປ ກໍ່ໃຫ້ຄວາມຮ່ວມມື ແລະ ເຫັນດີສະໜັບສະໜູນ ຕໍ່ຂໍ້ສະເໜີຂອງ ສປປ ລາວ ໂດຍສະເພາະແມ່ນ ສຶບຕໍ່ຮ່ວມມືໃນການຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈ  (MOU) ທີ່ທັງສອງປະເທດໄດ້ເຊັນຮ່ວມກັນ.