ທ່ານ ນ. ບຸນຄຳ ວໍລະຈິດ ຮອງລັດຖະມົນຕີ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມດ້ວຍຄະນະ ໄດ້ເຂົ້າຮ່ວມ ກອງປະຊຸມລະດັບວິຊາການ ກ່ຽວກັບ ແນວຄວາມຄິດທີ່ຍືນຍົງໃນອານາຄົດ ສໍາລັບການເສີມສ້າງໃນການປ່ຽນແປງທາງກາຍະພາບຂອງພູມມີປະເທດ ທີ່ຕິດພັນກັບ ການຄຸ້ມຄອງທີ່ດິນທໍລະນີສາດ ແລະ ການຄຸ້ມຄອງຄວາມສ່ຽງໄພພິບັດ ໃນລະຫວ່າງ ວັນທີ 22-29 ກັນຍາ 2018 ທີ່ເມືອງ ເມວເບີນ, ປະເທດ ອົດສະຕຣາລີ.

ກອງປະຊຸມໃນຄັ້ງນີ້ ແມ່ນໄດ້ຈັດຂຶ້ນ ໂດຍການເປັນເຈົ້າພາບຮ່ວມກັນ ລະຫວ່າງ ມະຫາວິທະຍາໄລເມວເບີນ  ແລະ ທະນາຄານໂລກ ໂດຍມີຈຸດປະສົງ ເພື່ອເສີມສ້າງແນວຄວາມຄິດ ແລະ ຄວາມເຂົ້າໃຈ ກ່ຽວກັບ ແນວທາງສະໜັບສະໜູນການຄຸ້ມຄອງທີ່ດິນ ແລະ ໜ່ວຍງານທໍລະນີວິທະຍາ, ການວາງແຜນພັດທະນາຕົວເມືອງ ແລະ ການຄຸ້ມຄອງຄວາມສ່ຽງໄພພິບັດ ລວມທັງການຕອບສະໜອງບໍລິການ ແລະ ແລກປ່ຽນຂໍ້ມູນຂ່າວສານ ເຊິ່ງພົວພັນເຖິງການປ້ອງກັນ, ການຫຼຸດຜ່ອນຄວາມສ່ຽງ, ຄວາມປອດໄພ, ຄວາມໝັ້ນຄົງ ແລະ ຄວາມຍືນຍົງ ໃນການສ້າງສາພັດທະນາເສດຖະກິດສັງຄົມຂອງປະເທດຕົນ ໂດຍພາຍໃຕ້ຄໍາຂວັນທີ່ວ່າ “ຄວາມສະຫຼຽວສະຫຼາດ ແລະ ຄວາມຍືນຍົງ ແມ່ນຂອງໝົດທຸກຄົນ “A smart Sustainable Future for All”. ໃຫ້ກຽດເປັນປະທານຮ່ວມໂດຍ ທ່ານ ອໍານວຍການໃຫຍ່ມະຫາວິທະຍາໄລ ເມວເບີນ ແລະ ຜູ້ຕາງໜ້າພິເສດຂອງກຸ່ມທະນາຄານໂລກ ເຊິ່ງມີແຂກລະດັບການນໍາຂັ້ນສູງ ຈາກ ຫລາຍປະເທດເຂົ້າຮ່ວມ ເຊັ່ນ: ສປປ ລາວ, ສິງກະໂປ, ປາກິດສະຖານ, ພະມ້າ, ເນປານ, ອິນໂດເນເຊຍ, ອິນເດຍ, ມາເລເຊຍ, ຍີ່ປຸ່ນ, ເກົາຫຼີໃຕ້, ອີລານ, ຊາວມົວ, ຕົງກາ, ຊີເລ, ເກາະຊາລາມອນ, ປາປູນີວກີເນຍ ລວມທັງນັກສາດສະດາຈານ, ນັກຄົ້ນຄ້ວາ ແລະ ຊ່ຽວຊານສາກົນ ເຊິ່ງລວມຜູ້ແທນເຂົ້າຮ່ວມທັງໝົດປະມານ 80 ກວ່າທ່ານ.