ໃນ​ວັນ​ທີ 15 ຕຸ​ລາ 2018 ທີ່​ຫ້ອງ​ປະ​ຊຸມ ຂະ​ແໜງ​ສິ່ງ​ແວດ​ລ້ອມ ໄດ້​ມີ​ການ​ເຊັນ​ບົດ​ບັນ​ທຶກ​ຄວາມ​ເຂົ້າ​ໃຈ ​ໃນ​ການ​ຮ່ວມ​ມື​ວິ​ຊາ​ການ ດ້ານ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ, ລະ​ຫວ່າງ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ແລະ ມະ​ຫາ​ວິ​ທະ​ຍາ​ໄລ​ແຫ່ງ​ຊາດ, ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສົມມາດ ພົ​ລ​ເສ​ນາ ລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ແລະ ທ່ານ ສ​ຈ ປອ ສົມ​ສີ ຍໍ​ພັນ​ໄຊ ວ່າ​ການ​ອະ​ທິ​ການບໍ​ດີ ມະ​ຫາ​ວິ​ທະ​ຍາ​ໄຊ​ແຫ່ງ​ຊາດ ພ້ອມ​ດ້ວຍ​ພະ​ນັກ​ງານ​ຂັ້ນ​ສູງ ທັງ​ສອງ​ຝ່າຍ​ເຂົ້າ​ຮ່ວມ.

      ຕາງ​ໜ້າ​ໃຫ້ ກ​ຊ​ສ, ຮ່ວມລົງນາມ ເຊັນ​ບົດ​ບັນ​ທຶກ ໂດຍ ທ່ານ ນາງ ບຸນ​ຄຳ ວໍ​ລະ​ຈິດ ຮອງລັດ​ຖະ​ມົນ​ຕີ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ແລະ ຜູ້ຕາງໜ້າຈາກ ມ​ຊ ທ່ານ ສ​ຈ ປອ ສົມ​ສີ ຍໍ​ພັນ​ໄຊ ວ່າ​ການ​ອະ​ທິ​ການບໍ​ດີ ມະ​ຫາ​ວິ​ທະ​ຍາ​ໄຊ​ແຫ່ງ​ຊາດ, ​ຊຶ່ງ​ເນື້ອ​ໃນ​ຂອງ​ບົດ​ບັນ​ທຶກ​ດັ່ງ​ກ່າວ​ປະ​ກອບ​ມີ​ໜ້າ​ວຽກ​ຈຸດ​ສຸມ​ຂອງ​ການ​ຮ່ວມ​ມື​ມີ​ດັ່ງ​ນີ້:

     ໜ້າ​ວຽກ​ທີ​ໜຶ່ງ​ແມ່ນ ເພື່ອ​ຜັນ​ຂະ​ຫ​ຍາຍ​ຜົນ​ຂອງກອງ​ປະ​ຊຸມ​ປຶກ​ສາ​ຫາ​ລື ຄັ້ງ​ວັນ​ທີ 28 ກັນ​ຍ​າ 2018 ທີ່ ມະ​ຫາ​ວິ​ທະ​ຍາ​ໄຊ​ແຫ່ງ​ຊາດ ໃຫ້​ປະ​ກົດ​ຜົນ​ເປັນ​ຈິງ,

     ໜ້າ​ວຽກ​ທີ​ສອງ​ແມ່ນ ເພື່ອ​ເສີມ​ຂະ​ຫ​ຍາຍ ຜົນ​ການ​ຈັດ​ຕັ້ງ​ປະ​ຕິ​ບັດ 5 ໂຄງ​ການ ຂອງ 5 ຄະ​ນະ​ວິ​ຊາ ຂອງ​ ມະ​ຫາ​ວິ​ທະ​ຍາ​ໄຊ​ແຫ່ງ​ຊາດ ທີ່​ໄດ້​ຮັບ​ທຶນ​ສະ​ໜັບ​ສະ​ໜູນ ຈາກກອງ​ທຶນ​ປົກ​ປັກ​ຮັກ​ສາ​ສິ່ງ​ແວດ​ລ້ອມ ໃນ​ບ້ວງ​ທຶນ ຂອງ​ທະ​ນາ​ຄານ​ໂລກ ຮອດ​ປີ 2020 ເຊິ່ງ​ມີ​ເປົ້າ​ໝາຍ: “ ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ ດ້ານ​ການ​ຄຸ້ມ​ຄອງ​ປ່າ​ສະ​ຫງວນ ແລະ ສັດ​ປ່າ, ດ້ານ​ການ​ປ້ອງ​ກັນ​ສັງ​ຄົມ ໃນ​ບັນ​ດາ​ໂຄງ​ການ​ລົງ​ທຶນ, ດ້ານ​ເສດ​ຖະ​ກິດ​ສິ່ງ​ແວດ​ລ້ອມ ແລະ ຊັບ​ພະ​ຍາ​ກອນ​ທຳ​ມະ​ຊາດ ​ທີ່​ກ່ຽວ​ຂ້ອງກັບ ການ​ຄຸ້ມ​ຄອງ​ສັດ​ປ່າ ແລະ ປ່າ​ສະ​ຫງວນ, ດ້​ານ​ການ​ປະ​ເມີນ​ຜົນ​ກະ​ທົບ​ຕໍ່​ສິ່ງ​ແວດ​ລ້ອມ ແລະ ກ່ຽວ​ກັບ​ວິ​ທະ​ຍາ​ສາດ​ທຳ​ມະ​ຊາດ ລວມ​ທັງ​ການ​ສຶກ​ສາ​ຜົນ​ກະ​ທົບ ຈາກ​ການ​ນຳ​ໃຊ້ ຢາ​ປາບ​ສັດ​ຕູ​ພຶດ ແລະ ບັນ​ຫາ​ທີ່​ພົ້ນ​ເດັ່ນ​ອື່ນໆ”.

     ສ່ວນ​ໜ້າ​ວຽກ​ທີ​ສາມ​ແມ່ນ ເພື່ອ​ເປັນ​ການຊຸກ​ຍູ້​ການ​ຮ່ວມ​ມື​ສອງ​ຝ່າຍ ຫຼື ຫຼາຍ​ຝ່າຍ ດ້ານ​ວິ​ຊາ​ການ ໃຫ້​ຂະ​ຫ​ຍາຍ​ກວ້າງ​ຂວາງ​ອອກ ແລະ ຮັບ​​ປະ​ກັນດ້ານ ແນ​ໃສ່ ປະ​ກອບ​ສ່ວນ​ເຂົ້າ​ໃນ​ການ​ຄຸ້ມ​ຄອງ ຊັບ​ພະ​ຍາ​ກອນ​ທຳ​ມະ​ຊາດ ແລະ ການ​ປົກ​ປັກ​ຮັກ​ສາ ສິ່ງ​ແວດ​ລ້ອມ ຕາມ​ທິດ​ສີ​ຂຽວ ແລະ ຍືນ​ຍົງ.

    ຜົນ​ສຳ​ເລັດ​ໃນ​ການ​ລິ​ເລີ່ມ​ການ​ຮ່ວມ​ມື​ໃນ​ຄັ້ງ​ນີ້ ແມ່ນ​ຈະ​ໄດ້​ເສີມ​ຂະ​ຫ​ຍາຍ ຂິດ​ຄວາມ​ສາ​ມາດ​ຂອງ​ທັງ​ສອງ​ພາກ​ສ່ວນ, ພ້ອມ​ທັງ​ຈະ​ຊ່ວຍ​ສະ​ໜັບ​ສະ​ໜູນເຂົ້າ​ໃນ​ແຜນ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ແຫ່ງ​ຊາດ ແລະ ຈະ​ເປັນ​ໜຶ່ງ​ໃນບັນ​ດາ​ປັດ​ໃຈ​ທີ່​​ເປັນ​ພື້ນ​ຖານ​ໃນ​ການປະ​ກອບ​ສ່ວນເຂົ້າ​ໃນ​ການ​ພັດ​ທະ​ນາ​ປະ​ເທດ​ຊາດ ຕາມ​ທິດ​ສິ​ຂຽວ ແລະ ຍືນ​ຍົງ.