ໃນ​ຕອນ​ເຊົ້າ​ຂອງວັນ​ທີ 10 ພຶດ​ສະ​ພາ 2018 ກອງ​ເລ​ຂາ​ຄະ​ນະ​ກຳ​ມະ​ການ ແມ່​ນ້ຳ​ຂອງ​ແຫ່ງ​ຊາດ ໄດ້​ຈັດ​ກອງ​ປະ​ຊຸມ ກອງ​ປະຊຸມລິ​ເລີ່​ມ​ໂຄງການຄຸ້ມ​ຄອງ ​ແລະ ປົກ​ປັກ​ຮັກສາ​ດິນ​ບໍລິ​ເວນ​ນໍ້າຢູ່​ຂົງ​ເຂດ​ອ່າງ​ແມ່​ນໍ້າຂອງ​ຕອນ​ລຸ່ມ ຂື້ນ​ທີ່ ໂຮງ​ແຮມ ປາກ​ເຊ ແຂວງ ຈຳ​ປາ​ສັກ, ໂດຍ​ໃຫັກຽດ​ເປັນ​ປະ​ທານ ຂອງ​ທ່ານ ບຸນ​ມີ ພຸດ​ທະ​ວົງ ຮອງ​ລັດ​ຖະ​ມົນ ກະ​ຊວງ ຊັບ​ພະ​ຍາກອ​ນ​ທຳ​ມະ​ຊາດ ແລະ ສິ່ງ​ແວດ​ລ້ອມ, ຜູ້​ເຂົ້າ​ຮ່ວມ  ​ຈາກ​ຕາງ​ໜ້າ ທະນາຄານ​ພັດທະນາ​ເຢຍລະ​ມັນ​ປະຈຳ ສປປ ລາວ, ມີຫົວໜ້າ​ກົມ, ຮອງກົມ, ຫົວ​ໜ້າ​ພະ​ແນກ​ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ແຂວງ ຈຳ​ປາ​ສັກ, ຈາກ​ຂະ​ແໜງ​ການ​ກ່ຽວຂ້ອງ,  ແລະ ທ່ານ ຜູ້​ຕາງໜ້າ​ຈາກ ​ອົງການຈັດຕັ້ງສາກົນ ​ເພື່ອ​ການ​ອະນຸລັກ​ທຳ​ມະ​ຊາດ (IUCN), ພ້ອມທັງ ອຳ​ນາດ​ການ​ປົກ​ຄອງ ທີ່ນອນ​ຢູ່​ໃນ​ໂຄງ​ການ​​ເຂົ້າ​ຮ່ວມ​ທັງ​ໝົດ 55 ທ່ານ.

     ຈຸດປະສົງຂອງກອງປະຊຸມໃນມື້ນີ້ແມ່ນ: ເພື່ອແຈ້ງໃຫ້ຂະແໜງການ ທັງສູນກາງ ແລະ ທ້ອງຖິ່ນຊາບ ກ່ຽວກັບການເລີ່ມຕົ້ນຈັດຕັ້ງປະຕິບັດໂຄງການ; ເພື່ອນໍຳສະເໜີ ຄວາມເປັນມາຂອງໂຄງການ ເປັນຕົ້ນແມ່ນ: ໂຄງຮ່າງການຈັດຕັ້ງຂອງໂຄງການ, ພາລະບົດບາດ ແລະ ຜົນໄດ້ຮັບຈາກການປະຕິບັດໂຄງການ; ເພື່ອນໍາສະເໜີ ປຶກ​ສາ​ຫາ​ລື ແລະ ປະ​ກອບ​ຄຳ​ເຫັນ​ໃສ່ ກ່ຽວກັບແຜນວຽກ 5 ປີ ແລະ 1 ປີ ຂອງ​ໂຄງ​ການ ເພື່ອສະເໜີສະພາບ ປະຈຸບັນ ແລະ ຂໍ້ມູນພື້ນຖານ ຂອງດິນບໍລິເວນນໍ້າຣາມຊາ ບຶງກຽດໂງ້ງ ຊຶ່ງແມ່ນພື້ນທີ່ ຂອງໂຄງການ ແລະ ເພື່ອສະເໜີພາລະບົດບາດ ແລະ ຄວາມຮັບຜິດຊອບຂອງຄະນະຈັດຕັ້ງປະຕິບັດໂຄງການ ຂັ້ນສູນກາງ ແລະ ທ້ອງຖິ່ນ;

     ​ເພື່ອ​ລິ​ເລີ່​ມ​ໂຄງການຄຸ້ມ​ຄອງ ​ແລະ ປົກ​ປັກ​ຮັກສາ​​ດິນ​ບໍລິ​ເວນ​ນໍ້າຢູ່​ຂົງ​ເຂດ​ອ່າງ​ແມ່​ນໍ້າຂອງ​ຕອນ​ລຸ່ມ ເປັນຕົ້ນແມ່ນການຄຸ້ມຄອງ ແລະ ປົກປັກຮັກສາ ດິນບໍລິເວນນໍ້າ ຢູ່ບຶງກຽດໂງ້ງ, ເມືອງ ປະທຸມພອນ ແຂວງ ຈຳປາສັກ, ໂດຍ​ປະຕິບັດຕາມສັນຍາ​ແມ່​ນໍ້າຂອງປີ 1995 ​ວ່າ​ດ້ວຍການຮ່ວມ​ມື​ເພື່ອ​​ພັດທະນາ​ອ່າງ​ແມ່​ນໍ້າຂອງ​ແບບ​ຍືນ​ຍົງຂອງສີ່ປະເທດ ແລະ ທັງເປັນການປະກອບສ່ວນ​ເຂົ້າ​ໃນ​ການ​ປົກປັກ​ຮັກສາ​​ແລະສົ່ງ​ເສີມ​ການ​ນໍາ​ໃຊ້​ຊັບພະຍາກອນ​ຊີວະ​ນາໆ​ພັນ ຢູ່​ຂົງ​ເຂດ​ອ່າງ​ແມ່​ນໍ້າຂອງ​ໃຫ້ມີ​ຄວາມ​ຍືນ​ຍົງ ໂດຍຕອບສະໜອງ ໃນການພັດທະນາ ເສດຖະກິດ-ສັງຄົມ ແລະ ຄວາມເປັນຢູ່ທີ່ດີຂອງປະຊາຊົນບັນດາປະເທດພາຄີ ໃຫ້ໂດຍສອດຄ່ອງກັບຄວາມຕ້ອງການ ເພື່ອປົກປ້ອງ, ຮັກສາ, ເສີມຂະຫຍາຍ, ຄຸ້ມຄອງເງື່ອນໄຂທາງດ້ານສິ່ງແວດລ້ອມ ແລະ ສິ່ງທີ່ມີຊີວິດຢູ່ໃນນໍ້າ ລວມທັງບຳລຸງຮັກສາຄວາມດຸ່ນດ່ຽງ ທາງດ້ານນິເວດວິທະຍາ ຕໍ່ອ່າງແມ່ນໍ້າຂອງ.

     ​ຄຽງ​ຄູ່​ກັບ​ການ​ຍົກລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນໃຫ້ດີຂຶ້ນ ກະ​ຊວງ ຊັບ​ພະ​ຍາກອ​ນ​ທຳ​ມະ​ຊາດ ແລະ ສິ່ງ​ແວດ​ລ້ອມ ຈຶ່ງໄດ້ຈັດຕັ້ງປະຕິບັດໂຄງການ ຄຸ້ມຄອງ ແລະ ປົກປັກຮັກສາ ດິນບໍລິເວນນໍ້າ ຢູ່ໃນເຂດອ່າງແມ່ນໍ້າຂອງຕອນລຸ່ມໂດຍການສະໜັບສະໜູນທຶນຈາກລັດຖະບານສະຫະພັນເຢຍລະມັນ ໂດຍຜ່ານ ຄະ​ນະ​ກຳ​ມາ​ທິ​ການແມ່ນໍ້າຂອງ​ສາ​ກົນ​ ແນໃສ່ປົກປັກຮັກສາ ແລະ ອະນຸລັກຊີວະນາໆພັນ ຢູ່ຂົງເຂດອ່າງແມ່ນໍ້າຂອງຕອນລຸ່ມຊຶ່ງສັນຍາແມ່ ໄດ້ເຊັນກັນລະຫວ່າງ ຄມສ ກັບລັດຖະບານສະຫະພັນເຢຍລະມັນ ຈຳນວນເງິນ 8 ລ້ານຢູໂຣ, ໃນນີ້ໄດ້ແບ່ງອອກເປັນ 4 ພູດເຊັ່ນ: 1 ລ້ານຢູໂຣຈ້າງຊ່ຽວຊານ, 1 ລ້ານຢູໂຣ ແມ່ນ ກອງເລຂາຄະນະກຳມາທິການແມ່ນ້ຳຂອງສາກົນ ຮັບ​ຜິດ​ຊອບ, 4 ລ້ານຢູໂຣ ເຊັນກັບກໍາປູເຈຍ ແລະ 2 ລ້ານຢູໂຣເຊັນກັນລະຫວ່າງ ສປປ ລາວ ກັບທະ​ນາ​ຄານ​ພັດ​ທະ​ນາ​ເຢຍ​ລະ​ມັນ (KfW) ແລະ ທຶນສົມທົບຂອງລັດຖະບານ ສປປລາວໃນຈຳນວນ 240,000 ຢູໂຣ, ມີໄລຍະຈັດຕັ້ງປະຕິບັດໂຄງການ 5 ປີ ແມ່ນໄດ້ເລີ່ມແຕ່ 2016 ເຖິງ 202​1.

     ພ້ອມ​ກັນ​ນັ້ນ​ໃນ​ກອງ​ປະ​ຊຸມ​ຍັງ​ໄດ້ ປະກອບ​ຄຳ​ຄິດ​ຄຳ​ເຫັນ​ໃສ່​ແຜນ​ວຽກ​ ຂອງ​ໂຄງການ​ຢ່າງກົງໄປກົງມາ ເພື່ອ​ເຮັດ​ແນວ​ໃດ​​ໃຫ້​ສາມາດ​ສ້າງ​ໄດ້​ແຜນ​ວຽກ​ ຂອງ​ໂຄງການ ​ທີ່​ແທດເໝາະ​ກັບ​ສະພາບ​ຕົວ​ຈິງ​ໃນ​ປັດຈຸບັນ​ຂອງພື້ນ​ທີ່​ໂຄງການ ​ແລະ ສະພາບ​ດ້ານ​ເສດຖະກິດ-ສັງຄົມ ​ຂອງ​ບັນດາ​ບ້ານ​ເປົ້າ​ໝາຍ​ຂອງ​ຄງການ​ແນ​ໃສ່​ເຮັດ​ໃຫ້ການ​ຄຸ້ມ​ຄອງ​ ດິນ​ບໍລິ​ເວນ​ນໍ້າ​ບຶງ​ກຽດ​ໂງ້ງ ​ກໍ່​ຄື​ການ​ຊົມ​ໃຊ້​ຊັບພະຍາກອນ​ຊີວະ​ນາໆ​ພັນ​ຂອງ​ບຶງ​ດັ່ງກ່າວມີ​ຄວາມ​ຍືນ​ຍົງຕະຫຼອດໄປ.