ກອງປະຊຸມສະຫຼຸບປະຈຳປີ 2017 ແລະ ທິດທາງແຜນການປີ 2018 ຂອງຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງ ສີສັດຕະນາກ ໄດ້ຈັດຂຶ້ນ ໃນວັນທີ 5 ເມສາ 2018, ທີ່ຫ້ອງປະຊຸມ ເມືອງ ສີສັດຕະນາກ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ດາວັນ ທົນນະວົງສາ ຮອງເຈົ້າເມືອງ ສີສັດຕະນາກ ເປັນກຽດເຂົ້າຮ່ວມໃນກອງປະຊຸມຄັ້ງນີ້ ມີ ທ່ານ ບຸນຊົມ ຊົງວິໄລ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ, ມີຕາງໜ້າຂະແໜງການ ແລະ ຫ້ອງການ ຊສ ເມືອງ 09 ເມືອງອອ້ມຂ້າງນະຄອນຫຼວງວຽງຈັນ ນອກນັ້ນຍັງມີ ນາຍບ້ານ 37 ບ້ານ ພ້ອມດ້ວຍພະນັກງານວິຊາການເຂົ້າຮ່ວມທັງໝົດ 60 ກວ່າຄົນ.

      ໃນພິທີ ທ່ານ ວິຊຸນ ສີລັດຕະນະກູນ ຫົວໜ້າຫ້ອງການ ຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງ ສີສັດຕະນາກ ໄດ້ຂື້ນກ່າວຈຸດປະສົງ ແລະ ຜ່ານບົດສະຫຼູບປະຈຳປີ 2017 ພ້ອມທັງສະເໜີທິດທາງແຜນການປີ 2018. ໃນໄລຍະໜຶ່ງປີຜ່ານມາຫ້ອງການ ຊສ ເມືອງ ສາມາດຍາດໄດ້ຜົນສຳເລັດໃນຫຼາຍດ້ານ ໂດຍສະເພາະແມ່ນດ້ານການເມືອງ ແນວຄິດ ໂດຍພາຍໃຕ້ການຊີ້ນຳຂອງອົງຄະນະພັກ ເມືອງ ສີສັດຕະນາກ ຕະຫຼອດໄລຍະຜ່ານມາ ຄະນະນຳຫ້ອງການ ຊສ ເມືອງໄດ້ຖືເອົາວຽກງານ ສຶກສາອົບຮົມ ເປັນຕົ້ນຕໍໃຫ້ແກ່ພະນັກງານວິຊາການ ເຊື່ອມຊຶມ ຕໍ່ແນວທາງນະໂຍບາຍຂອງພັກ, ເຊື່ອໝັ້ນຕໍ່ການນຳພາອັນສະຫຼາດສ່ອງໃສຂອງພັກ, ໜັກແໜ້ນທາງດ້ານແນວຄິດການເມືອງຕີຖອຍຕໍ່ທຸກປະກົດການຫຍໍ້ທໍ້ ແລະ ຍຶດໝັ້ນອຸດົມການສັງຄົມນິຍົມເປັນເຈົ້າການໃນການຈັດຕັ້ງປະຕິບັດແນວທາງຂອງພັກ ແລະ ຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ x ຂອງສູນກາງພັກໂດຍສະເພາະແມ່ນເນື້ອໃນ 4 ບຸກທະລຸຂອງພັກ ເຂົ້າໃນການຈັດຕັ້ງປະຕິບັດວຽກງານວິຊາສະເພາະ ຈຶ່ງສາມາດຍາດໄດ້ຜົນສຳເລັດເປັນກ້າວໆມາ

 

    ທ່ານ ບຸນຊົມ ຊົງວິໄລ ຮອງພະແນກ ຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ປະກອບຄຳເຫັນໃສ່ບົດສະຫຼຸບ ແລະ ໃຫ້ທິດຊີ້ນຳບາງດ້ານ ດັ່ງນີ້ ຊື່ງກ່ອນອື່ນທ່ານກໍ່ໄດ້ສະແດງຄວາມຊົມເຊີຍຕໍ່ຜົນສຳເລັດໃນການຈັດຕັ້ງປະ​ຕິ​ບັດວຽກງານຂອງຫ້ອງການ ຊສ ເມືອງ ສີສັດຕະນາກ ທີ່ຍາດມາໄດ້ໄປຄຽງຄູ່ກັບດ້ານຕັ້ງໜ້ານັ້ນ ກໍ່ຍັງມີບາງດ້ານທີ່ເປັນຂໍ້ຄົງຄ້າງຈະຕ້ອງໄດ້ແກ້ໄຂໃນໂອກາດນີ້ ທ່ານ ບຸນຊົມ ຊົງວິໄລ ໄດ້ຮຽກຮ້ອງໃຫ້ຄະນະນຳຂອງຫ້ອງການ ຊສ ເມືອງ ຈົ່ງໄດ້ສຶບຕໍ່ເອົາໃຈໃສ່ ສຶກສາອົບຮົມວຽກງານ ການເມືອງແນວຄິດຂອງພະນັກງານ ໃຫ້ມີຄວາມອຸ່ນອ່ຽນທຸ່ນທ່ຽງ ແລະ ມີຈັນຍາບັນໃນການປະຕິບັດວຽກງານ ວິຊາສະເພາະ ໂດຍສະເພາະແມ່ນ ພະນັກງານ ທີ່ເຮັດວຽກໃນຂົງເຂດທີ່ດິນຕ້ອງມີທັດສະນະຫຼັກໝັ້ນ ຊື່ສັດ ບໍລິສຸດຕໍ່ຊາດ ຕໍ່ປະຊາຊົນ ຈິງໃຈບໍລິການ ຮັບໃຊ້ປະຊາຊົນຢ່າງແທ້ຈິງ ມີຄວາມໂປ່ງໃສ ຫຼີກລ້ຽງການກົດໜ່ວງທວງດຶງ ເພື່ອທວງຜົນປະໂຫຍດສ່ວນຕົວຫຼາຍກວ່າສ່ວນລວມ

    ພ້ອມກັນນັ້ນ ທ່ານ ກໍ່ຍັງໄດ້ເນັ້ນໃຫ້ເອົາໃຈໃສ່ກໍ່ສ້າງພັດທະນາທາງດ້ານບຸກຄະລາກອນໃຫ້ມີຄວາມເຂັ້ມແຂງ, ມີຄວາມຮູ້ຄວາມສາມາດ ມີຄຸນສົມບັດ, ສິນທຳປະຕິວັດ ມີຄຸນທາດການເມືອງໜັກແໜ້ນ ເພື່ອຕອບສະໜອງໄດ້ນະໂຍບາຍຂອງກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ດັ່ງຄຳຂວັນທີ່ວ່າ ເຮັດໃຫ້ດີ, ເຮັດໃຫ້ໄວ, ເຮັດໃຫ້ໄດ້ຫຼາຍ ຮັບປະກັນຄຸນນະພາບ ແລະ ເຮັດໃຫ້ຖືກກົດໝາຍ.

    ຈາກນັ້ນ ທ່ານ ດາວັນ ທັນນະວົງສາ ຄະນະປະຈໍາພັກເມືອງ ຮອງເຈົ້າເມືອງ ສີສັດຕະນາກ ກໍ່ໄດ້ມີຄຳເຫັນຊີ້ນຳຕໍ່ກອງປະຊຸມຊຶ່ງໄດ້ກ່າວບາງຕອນວ່າ:  ກ່ອນອື່ນທ່ານ ກໍ່ໄດ້ສະແດງຄວາມຊົມເຊີຍ ເຫັນດີ ເປັນເອກະພາບນຳບົດສະຫຼຸບຂອງຫ້ອງການ ຊສ ເມືອງ ສີສັດຕະນາກ ຜ່ານມາຫ້ອງການດັ່ງກ່າວແມ່ນໄດ້ຕັ້ງໜ້າປະຕິບັດວຽກງານຢ່າງຫ້າວຫັນ ແລະ ມີຜົນສຳເລັດໃນຫຼາຍດ້ານ ໂດຍສະເພາະການແກ້ໄຂປະກົດການຫຍໍ້ທໍ້ໃນຂົງເຂດທີ່ດິນ ຊຶ່ງສາເຫດທີ່ພາໃຫ້ເກີດຂໍ້ຂັດແຍ່ງ ກໍ່ຍ້ອນຊັບພະຍາກອນທີ່ດິນ ແມ່ນ ມີຄວາມສຳຄັນທີ່ຕິດພັນຕໍ່ກັບການດຳລົງຊີວິດຂອງປະຊາຊົນ ໂດຍກົງ.

       ນອກນັ້ນ ທີ່ດິນຍັງຕິດພັນກັບທຸກພາກສ່ວນ ທຸກຂະແໜງການໃນສັງຄົມ ເຊັ່ນ: ຂົງເຂດເສດຖະກິດ, ຂົງເຂດວັດທະນາທຳ-ສັງຄົມ ແລະ ອື່ນໆ

          ຜ່ານມາໄດ້ມີຫຼາຍຂໍ້ຂັດແຍ່ງກ່ຽວກັບທີ່ດີນເກີດຂື້ນພາຍໃນເມືອງ ແຕ່ກໍ່ສາມາດແກ້ໄຂໃຫ້ມີຄວາມສະຫງົບໄດ້ ຕໍ່ຜົນງານດັ່ງກ່າວນັ້ນ ທ່ານ ຮອງເຈົ້າເມືອງ ກໍ່ໄດ້ຮຽກຮ້ອງມາຍັງ ຄະນະນຳຄື ພະນັກງານ ແລະ ຫຼັກແຫຼ່ງຂອງຫ້ອງການ ຊສ ຈຶ່ງສຶບຕໍ່ຮັກສາມູນເຊື້ອ ແລະ ນຳເອົາເນື້ອໃນຈິດໃຈຂອງຂັ້ນເທິງໄປຜັນຂະຫຍາຍເຂົ້າໃນວຽກງານຂອງຕົນ ໃຫ້ເກີດດອກອອກຜົນ ແລະ ມີປະສິດທິຜົນສູງ ເຮັດໃຫ້ປະກົດການຫຍໍ້ທໍ້ໃນຂົງເຂດທີ່ດີນໃຫ້ນັບມື້ຫຼຸດໜ້ອຍຖອຍລົງເປັນກ້າວໆ.