ກົມ​ຈັດ​ຕັ້ງ​ ແລະ ພະ​ນັກ​ງານ ກ​ະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໄດ້​ເປີດກອງ​ປະ​ຊຸມ​ສຳ​ມະ​ນາຫຼັກ​ສູດ​ບໍ​ລິ​ຫານ​ງານຊັບ​ພະ​ຍາ​ກອນ​ມະ​ນຸດ ໃຫ້​ພະ​ນັກ​ງານ-ລັດ​ຖະ​ກອນ ພາຍ​ໃນ ກ​ຊ​ສ ຜູ້​ທີ່​ເຮັດ​ວຽກ​ງານ​ຈັດ​ຕັ້ງ ແລະ ພະ​ນັກ​ງານ ຂື້ນ​​ໃນ​ວັນ​ທີ 12 ມີ​ນາ 2018 ທີ່​ສະ​ໂມ​ສອນ ກ​ຊ​ສ, ໂດຍ​ການ​ເປັນ​ປະ​ທານ​ຂອງ ທ່ານ​ນາງ ທອງ​ຈັນ ອະ​ຄະ​ມາ​ເຂດ ຮອງ​ຫົວ​ໜ້າ​ກົມ ຈັດ​ຕັ້ງ ແລະ ພະ​ນັກ​ງານ, ວິ​ທະ​ຍາ​ກອນ​ຈາກ ກະ​ຊວງ ພາຍ​ໃນ, ນັກ​ສຳ​ມະ​ນາ​ກອນ​ຈາກ ຫ້ອງ​ການ, ກົມ​, ກອງ, ສູນ ແລະ ສະ​ຖາ​ບັນ ພ້ອມ​ທັງ​ພະ​ນັກ​ງານ​ວິ​ຊາ​ການ​ພາຍ​ໃນ​ກົມ​ເຂົ້າ​ຮ່ວມ.

     ຈຸດ​ປະ​ສົງ​ໃນ​ການ​ສຳ​ມະ​ນາ​ໃນ​ຄັ້ງ​ນີ້​ແມ່ນ​ເພື່ອ​ຍົກ​ລະ​ດັບ​ຄວາມ​ຮູ້ ຄວາມ​ສາ​ມາດ​ຂອງ​ພະ​ນັກ​ງານ ຜູ້​ທີ່​ເປັນ​ເສ​ນາ​ໃຫ້​ຄະ​ນະ​ພັກ ຄະ​ນະ​ນຳ​ຢູ່​ບັນ​ດາ​ກົມ, ກອງ ກ່ຽວ​ກັບ​ວຽກ​ງານ​ຈັດ​ຕັ້ງ​ພະ​ນັກ​ງານ ໂດຍ​ສະ​ເພາະ​ແມ່ນ​ການ​ວິ​ເຄາະ​ການ​ກຳ​ນົດ​ຕຳ​ແໜ່ງ​ງານ​ການ​ຄຸ້ມ​ຄອງ​ພະ​ນັກ​ງານ​ລັດ​ຖະ​ກອນ​ລວມ​ທັງ​ການ​ຍົກ​ລະ​ດັບ​ບຳ​ລຸງ​ໃນ​ການກໍ່​ສ້າງ​ພະ​ນັກ​ງານ ລັດ​ຖະ​ກອນກໍ່​ຄື​ການ​ພັດ​ທະ​ນາ​ຄົນ, ພັດ​ທະ​ນາ​ອົງ​ການ​ຈັດ​ຕັ້ງ, ພັດ​ທະ​ນາ​ຕົນ​ເອງ ເຊິ່ງ​ລວມ​ມີ​ການ​ຄຸ້ມ​ຄອງ, ມີ​ການກໍ່​ສ້າງ, ມີ​ການ​ນຳ​ໃຊ້ ລວມ​ຢູ່​ໃນຫຼັກ​ສູດ​ການ​ຄຸ້ມ​ຄອງຊັບ​ພະ​ຍາ​ກອນ​ມະ​ນຸດ.

     ເຊິ່ງ​ຫົວ​ຂໍ້​ທີ່​ນຳ​ມາ​ຝຶກ​ອົບ​ຮົມ​ມີ 5 ຫົວ​ຂໍ້​ ເຊັ່ນ​ ການ​ວິ​ເຄາະ ແລະ ພັດ​ທະ​ນາ​ອົງ​ການ​ຈັດ​ຕັ້ງ, ການ​ວິ​ເຄາະ​ຕຳ​ແໜ່ງ​ງານ, ການ​ຄຸ້ມ​ຄອງ​ຊັບ​ພະ​ຍາ​ກອນ​ມະ​ນຸດ, ການ​ພັດ​ທະ​ນາ​ພະ​ນັກ​ງານ-ລັດ​ຖະ​ກອນ ແລະ ການ​ປະ​ເມີນ​ພະ​ນັກ​ງານ-ລັດ​ຖະ​ກອນ, ນອກນັ້ນ​ນັກ​ສຳ​ມະ​ນາ​ກອນກໍ່​ຈະ​ໄດ້​ແລກ​ປ່ຽນ​ບົດ​ຮຽນ, ປຶກ​ສາ​ຫາ​ລື​ກັນ​ໃນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ທີ່​ຜ່ານ​ມາ ແລະ ທິດ​ທາງ​ຕໍ່​ໜ້າ ການ​ສຳ​ມະ​ນາກໍ່​ໄດ້​ດຳ​ເນີນ​ໄປ​ເປັນ​ເວ​ລາ 5 ວັນ.