ກອງປະຊຸມເຜີຍແຜ່ຜົນສໍາເລັດ ກອງປະຊຸມວຽກງານຈັດຕັ້ງ ແລະ ວຽກງານກວດກາ ທົ່ວປະເທດ ປີ 2017 ຂອງກະຊວງ ຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ຈັດຂຶ້ນລະຫວ່າງວັນທີ 26-27 ມີນາ 2018 ທີ່ຫ້ອງປະຊຸມ ກຊສ ໂດຍ​ການເປັນປະທານຂອງທ່ານ ສົມມາດ ພົ​ລເສນາ ລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ມີບັນດາຄະນະປະຈໍາພັກ ຄະນະພັກ ເລຂາໜ່ວຍພັກ​ຫ້ອງ​ການ, ເລ​ຂາ​ໜ່ວຍ​ພັກກົມ, ກອງ, ສູນ ສະຖາບັນ ສະມາຊິກພັກ-ພະນັກງານທົ່ວກະຊວງເຂົ້າຮ່ວມ.

     ທ່ານ ​ສົມ​ມາດ ພົ​ລ​ເສ​ນາ ກຳ​ມະ​ການ​ສູນ​ກາງ​ພັກ, ເລ​ຂາ​ຄະ​ນະ​ພັກ, ລັດຖະມົນຕີ ກະຊວງຊັບພະຍາ ກອນທໍາມະຊາດ ແລະ ສິ່ງແວດລ້ອມ ກ່າວວ່າ: ການຈັດຕັ້ງປະຕິບັດຕໍ່ກັບວຽກງານຈັດຕັ້ງ ແລະ ວຽກງານກວດກາ ໃນໄລຍະຜ່ານມາແມ່ນໄດ້ເຄື່ອນໄຫວຕາມສິດ ແລະ ໜ້າທີ່ຂອງຕົນເປັນຢ່າງດີ ເປັນເສນາທິການໃຫ້ແກ່ຄະນະພັກ ຄະນະນໍາ ໃນຂົງເຂດວຽກງານຕົນຮັບຜິດຊອບ ເຊິ່ງເຫັນໄດ້ຜົນສໍາເລັດຫຼາຍດ້ານ ຂອງ 2 ວຽກງານດັ່ງກ່າວ ຄື: ວຽກງານຈັດຕັ້ງແມ່ນໄດ້ຮັບສໍາເລັດການປັບປຸງ ແລະ ຮັບຮອງເປັນທາງການຕໍ່ກັບພາລະບົດບາດຂອງກະຊວງ ບັນດາກົມ ກອງ ສູນ ສະຖາບັນ ພະແນກ ຊສ ແຂວງ, ນະຄອນຫຼວງ ແລະ ຫ້ອງການ ຊສເມືອງ ສໍາເລັດການຊັບຊ້ອນຈັດຕັ້ງພະນັກງານ ລັດຖະກອນ ຂັ້ນຄະນະກົມ, ຄະນະພະແນກ ແລະ ວິຊາການຈໍານວນໜຶ່ງ ຕາມກົງຈັກການຈັດຕັ້ງ ພ້ອມດຽວກັນກໍໄດ້ມີການສ້າງໜ່ວຍພັກໃໝ່ ມີການທາບທາມເອົາຮອງເລຂາໜ່ວຍພັກ ແລະ ຈັດຕັ້ງບົງຕົວວ່າການແທນເລຂາໜ່ວຍພັກຈໍານວນໜຶ່ງທີ່ເຫັນວ່າຖືກຕາມລະບຽບ ແລະ ແທດເໝາະຕົວຈິງ ແລະ ໜ້າວຽກດ້ານອື່ນໆ ສ່ວນວຽກງານກວດກາ ຄະນະພັກກວດກາພັກກະຊວງ ກໍໄດ້ປະຕິບັດຕາມແຜນດໍາເນີນງານ ຕັ້ງໜ້າບຸກບືນເອົາໃຈໃສ່ວຽກງານຕິດຕາມກວດກາ ສະກັດກັ້ນ ແລະ ຕ້ານການສໍ້ລາດບັງຫຼວງ ຄົ້ນຄວ້າແກ້ໄຂຄໍາຮ້ອງ-ຄໍາສະເໜີ ແລະ ປັບປຸງການຈັດຕັ້ງ ມີຜົນສໍາເລັດຫຼາຍດ້ານ ຄຽງຄູ່ກັນນັ້ນ ກໍຍັງມີຈຸດອ່ອນ ແລະ ຂໍ້ຄົງຄ້າງ ຫຼາຍບັນຫາ ທີ່ຍັງບໍ່ທັນໄດ້ຄົ້ນຄວ້າຈັດຕັ້ງປະຕິບັດຢ່າງເລິກເຊິ່ງເຖິງຖອງ ບາງດ້ານກໍໄດ້ຈັດຕັ້ງປະຕິບັດ ແຕ່ກໍບໍ່ທັນຄົບຖ້ວນ ແລະ ບາງເທື່ອກໍບໍ່ຕໍ່ເນື່ອງ.

     ໃນ​ກອງ​ປະ​ຊຸມ​ຈະ​ໄດ້​ຮັບ​ຟັງ ບົດ​ສະຫຼຸບ​ວຽກ​ງານ​ການ​ຈັດ​ຕັ້ງ-ພະ​ນັກ​ງານ​ປະ​ຈຳ​ປີ 2017 ແລະ ທິດ​ທາງ​ແຜນ​ການ​ຂອງ​ປີ 2018, ບົດ​ສະຫຼຸບ​ການ​ເຄື່ອນ​ໄຫວ​ວຽກ​ງານ​ການກວດ​ກາ​ປີ 2017 ແລະ ທິດ​ທາງ​ແຜນ​ການ​ຂອງ​ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ພ້ອມ​ນັ້ນ​ກໍ່​ໄດ້​ຮັບ​ຟັງການ​ເຜີຍ​ແຜ່ຜັນ​ຂະ​ຫ​ຍາຍ​ບົດ​ສະຫຼຸບ​ວຽກ​ງານ​ຈັດ​ຕັ້ງ, ວຽກ​ງານກວດ​ກາ ແລະ ບົດ​ຄຳ​ເຫັນ​ໂອ້​ລົມ ຂອງ​ທ່ານ ຈັນ​ສີ​ ໂພ​ສີ​ຄຳ ກຳ​ມະ​ການ​ກົມ​ການ​ເມືອງ​ເລ​ຂາ​ທິ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ຈັດ​ຕັ້ງ ສູນ​ກາງ​ພັກ ແລະ ບົດ​ໂອ້​ລົມ​ຂອງ​ສະ​ຫາຍ ປອ ບຸນ​ທອງ ຈິດ​ມະ​ນີ ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ເລ​ຂາ​ທິ​ການ​ສູນ​ກາງ​ພັກ, ຮອງ​ລັດ​ຖະ​ມົນ​ຕີ ປະ​ທານ​ຄະ​ນະ​ກວດ​ກາ​ສູນ​ກາງ​ພັກ ແລະ ອົງ​ການກວດ​ກາ​ລັດ​ຖະ​ບ​ານ ແລະ ຫົວ​ໜ້າ​ອົງ​ການ​ຕ້ານ​ການ​ສໍ້​ລາດ​ບັງຫຼວງ ​ຂັ້ນ​ສູນ​ກາງ ຕໍ່​ວຽກ​ງານກວດ​ກາ​ທົ່ວ​ປະ​ເທດ​ປະ​ຈຳ​ປີ 2017.

     ກອງປະຊຸມຄັ້ງນີ້ ຜູ້​ເຂົ້າ​ຮ່ວມກອງ​ປະ​ຊຸມ​ຍັງ​ໄດ້​ປະ​ກອບ​ຄຳ​ຄິດ​ເຫັນ​ຕີ​ລາ​ຄາ ກ່ຽວກັບວຽກງານຈັດຕັ້ງ ວຽກງານກວດກາ ແລະ ວຽກງານອື່ນໆ ທີ່ຕິດພັນກັບວຽກງານຈັດຕັ້ງ ວຽກງານກວດກາ ເພື່ອພ້ອມກັນປັບປຸງແກ້ໄຂທັນເວລາ ຕີຖອຍດ້ານອ່ອນ ເສີມຂະຫຍາຍດ້ານດີ ຊຶ່ງ​ໄດ້​ມີ​ການ ປະກອບຄໍາຄິດຄໍາເຫັນຢ່າງເລິກເຊິ່ງ ເປັນເອກະພາບຕໍ່ທິດທາງໜ້າທີ່ຈຸດສຸມໃນແຕ່ລະດ້ານໃນຕໍ່ໜ້າ ແນໃສ່ເຮັດໃຫ້ວຽກງານຈັດຕັ້ງ ວຽກງານກວດກາ ມີຄວາມເຂັ້ມແຂງ ສະພາບແນວຄິດພະນັກງານ-ລັດຖະກອນມີຄວາມສະຫງົບ ແລະ ມີການຫັນປ່ຽນທີ່ດີຂຶ້ນກວ່າເກົ່າ ເພື່ອພ້ອມກັນປະຕິບັດໜ້າທີ່ການເມືອງທີ່ພັກ-ລັດມອບໝາຍໃຫ້ດ້ວຍຄວາມຮັບຜິດຊອບສູງ ເພີ່ມທະວີເອົາໃຈໃສ່ການປັບປຸງກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ພ້ອມທັງຍົກສູງພາລະບົດບາດການນໍາພາຂອງພັກທຸກຂັ້ນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ I ຂອງອົງຄະນະພັກ ກຊສ ໃຫ້ປະກົດຜົນເປັນຈິງ.