ໃນ​ວັນ​ທີ 14 ມີ​ນາ 2018 ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໄດ້​ຈັດ​ພິ​ທີ ພົບ​ປະ​ບັນ​ດາ​ພະ​ນັກ​ງານຫຼັກ​ແຫຼ່ງ ແລະ ພະ​ນັກ​ງານວິ​ຊາກ​ານ​ຂອງ​ກະ​ຊວງ​ຂື້ນ ​ການ​​ພົບ​ປະ​ຄັ້ງ​ນີ້​ໂດຍ​ມີ​ທ່ານ ປອ ນາງ ບົວ​ຄຳ ທິບ​ພະ​ວົງ ຄະ​ນະ​ປະ​ຈຳ​ສະ​ພາ​ແຫ່ງ​ຊາດ, ປະ​ທານ​ກຳ​ມະ​ການ​ຍຸດ​ຕິ​ທຳ ສະ​ພາ​ແຫ່ງ​ຊາດ, ສະ​ມາ​ຊິກ​ສະ​ພາ​ແຫ່ງ​ຊາດ​ຊຸດ​ທີ VIII ປະ​ຈຳ​ເຂດ​ເລືອກ​ຕັ້ງ​ທີ 1 ນະ​ຄອນຫຼວງວຽງ​ຈັນ; ທ່ານ ນາງ​ຄຳ​ຟອງ ພູມ​ວົງ​ໄຊ ຮອງ​ປະ​ທານ​ຄະ​ນະ​ສະ​ມາ​ຊິກ ສະ​ພາ​ແຫ່ງ​ຊາດ ປະ​ຈຳ​ເຂດ​ເລືອກ​ຕັ້ງ​ທີ 1 ຮອງ​ປະ​ທານ​ສະ​ພາ​ປະ​ຊາ​ຊົນ ນະ​ຄອນຫຼວງວຽງ​ຈັນ; ທ່ານ ຄຳ​ເຜີຍ ວົງ​ສາ​ຄຳ​ຜຸຍ ສະ​ມາ​ຊິກ​ສະ​ພາ​ແຫ່ງ​ຊາດ​ຊຸດ​ທີ VIII ທັງ​ຄວບເປັນ​ສະ​ມາ​ຊິກປະ​ຊາ​ຊົນ​ນະ​ຄອນຫຼວງວຽງ​ຈັນ ຊຸດ​ທີ 1, ຜູ້​ອຳ​ນວຍ​ການ​ລັດ​ວິ​ສາ​ຫະ​ກິດ ນ້ຳ​ປະ​ປາ​ນະ​ຄອນຫຼວງວຽງ​ຈັນ,

ໂດຍ​ການເຂົ້າ​ຮ່ວມຂອງ​ທ່ານ ສົມ​ມາດ ພົ​ລ​ເສ​ນາ ລັດ​ຖະ​ມົນ​ຕີ​ ກະ​ຊວງ ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ມີ ຫົວ​ໜ້າ​ຫ້ອງ​ການ, ຫົວ​ໜ້າ​ກົມ, ກອງ, ສູນ, ສະ​ຖາ​ບັນ ພ້ອມ​ດ້ວຍ​ພະ​ນັກ​ງານ​ພາຍ​ໃນ ກ​ຊ​ສ ເຂົ້າ​ຮ່ວມ​ທັງ​ໝົດ 259 ຄົນ, ຍິງ 94 ຄົນ.

     ໃນ​ພິ​ທີ ທ່ານ ສົມ​ມາດ ພົ​ລ​ເສ​ນາ ກໍ່​ໄດ້​ຂື້ນ​ລາຍ​ງານ​ກ່ຽວ​ກັບ​ສະ​ພາບ​ລວມ​ຂອງ​ກະ​ຊວງ​ຕໍ່​ຄະ​ນະ​ຜູ້​ແທນ, ຈາກນັ້ນ ສະ​ມາ​ຊິກ​ສະ​ພາກໍ່​ໄດ້​ເຜີຍ​ແຜ່​ບົດ​ຄຳ​ສະ​ເໜ​ີ​ເປັນ​ຕົ້ນ​ແມ່ນ ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ແຫ່ງ​ຊາດ, ແຜນ​ງົບ​ປະ​ມານ​ແຫ່ງ​ຊາດ, ພັດ​ທະ​ນາ​ວຽກ​ງານ​ປີ​ທ່ອງ​ທ່ຽວ, ວຽກ​ງານ​ສະ​ພາ​ແຫ່ງ​ຊາດ ແລະ ສະ​ພາ​ນະ​ຄອນຫຼວງວຽງ​ຈັນ, ການ​ເອົາ​ໃຈ​ໃສ່​ພັດ​ທະ​ນາ​ບຸກ​ຄະ​ລາ​ກອນ​ພາຍ​ໃນ​ອົງ​ການກວດ​ກາ​ລັດ​ຖະ​ບານ, ຄຳ​ຂວັນ 3 ຫຼຸດ 3 ເພີ່ມ ແລະ 5 ຮ່ວມ ຂອງ​ນະ​ຄອນຫຼວງວ​ຽງ​ຈັນ, ການ​ສໍ້​ລາດ​ບັງຫຼວງ ສໍ້ຫຼວງ​ບັງ​ລາດ, ການ​ຈັດ​ຕັ້ງ​ປະ​ຕິ​ບັດ​ຄຳ​ຕັດ​ສີນ​ຂອງ​ສານ ແລະ ວຽກ​ງານ​ຍຸດ​ຕິ​ທຳ, ການ​ປະ​ຕິ​ບັດ​ວຽກ​ງານ​ຂອງ​ເຈົ້າ​ໜ້າ​ທີ່ ແລະ ຄຳ​ສະ​ເໜີ​ຂອງ​ປະ​ຊາ​ຊົນ​ທີ່​ສະ​ເໜີ​ໃຫ້​ພາກ​ສ່ວນ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ​ແກ້​ໄຂ ແລະ ວຽກ​ງານ​ອື່ນໆ​ທີ່​ເປັນ​ປະ​ກົດ​ການ​ຫ​ຍໍ້​ທໍ້​ໃນ​ສັງ​ຄົມ ທັງ​ນີ້ກໍ່​ເພື່ອ​ໃຫ້​ພະ​ນັກ​ງານ-ລັດ​ຖະ​ກອນ​ໃນ​ຂົງ​ເຂດ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ເຫັນ​ໄດ້​ພາ​ລະ​ບົດ​ບາດ ການ​ເຮັດ​ວຽກ​ຂອງ​ສະ​ມາ​ຊິກ​ສະ​ພາ​ແຫ່ງ​ຊາດ ກໍ່​ຄື​ຂົງ​ເຂດ​ຕຸ​ລາ​ການ ຕື່ມ​ອິກ​ບາດ​ກ້າວ​ໜຶ່ງ.